A sede da Asociación de Empresarios foi o escenario dunha xornada técnica na que se trataron temas como os riscos das redes sociais ou a identidade corporativa en liña.
Ciberseguridade é un termo co que deben empezar a familiarizarse as empresas ourensás e que cobra cada vez máis relevancia polos ataques a sistemas informáticos que se incrementan cada día que pasa.
Consciente diso, a Asociación de Empresarios do Polígono de San Cibrao organizou unha xornada técnica na que se instruíu ás compañías sobre o risco de delitos como estafas ou a suplantación de identidade, entre outros temas de interese.
Así o explicou o presidente da entidade empresarial, José Antonio Rodríguez Araújo:
“Debido a esta intolerable e vergoñenta guerra en territorio europeo, o risco de ciberataques increméntase, non só en Ucraína, senón tamén nos países que lle expresen o seu apoio”.
Ademais de Rodríguez Araújo, na presentación da xornada, celebrada no salón de actos da Asociación de Empresarios, tamén estivo presente o capitán da Comandancia da Garda Civil de Ourense, José Luis Casas Rivero.
Efrén Varón Gil e Roberto Valente López, membros do Equipo@Ourense e Equipo@Santamaría da Comandancia de Ourense, puxeron exemplos reais de delitos sufridos por empresas.
Foron Efrén Varón Gil e Roberto Valente López, ambos membros da Comandancia da Garda Civil de Ourense, os expertos encargados en instruír aos asistentes sobre o risco deste tipo de delitos.
Concienciaron sobre a importancia da ciberseguridade e aseguraron que cantas máis nocións sobre este tema teñan as empresas, menos denunciarán, xa que detectarán moito antes os problemas.
Con exemplos reais de estafas denunciadas por empresas de Ourense nos últimos tempos, os relatores trataron de familiarizar aos presentes en temas como o uso seguro do correo electrónico, as prácticas de navegación segura, a xestión de contrasinais ou o risco das redes sociais, entre outros asuntos de interese.
Tamén identificaron diferentes tipos de virus e malware e contestaron as dúbidas dos profesionais que participaron na iniciativa.
O capitán da Comandancia da Garda Civil en Ourense, José Luis Casas Rivero, agradeceu á Asociación de Empresarios a organización desta xornada e manifestou a súa intención de seguir levándoas a cabo na provincia pola súa importancia para fomentar a cultura de seguridade na empresa.